Аймгийн иргэдийн Төлөөлөгчдийн Хурлын ээлжит Х  хуралдаан үргэлжилж байна. Хэлэлцэх асуудлын дарааллын дагуу Халхгол сумын Ялалт багийн ЕБС-ийг нэрт дипломатч Баярын Жаргалсайханы нэрэмжит болгох тухай асуудлыг хэлэлцэж, дэмжин баталлаа. Б.Жаргалсайхан нь 1915 онд Дорнод аймгийн Халхгол сумын нутагт төрсөн. Тэрээр Монгол улсын гадаад харилцааны салбарт 1941 оноос эхлэн 40 гаруй жил ажиллахдаа Засгийн газрын протоколын эрхлэгч, Гадаад явдлын яамны ёслолын хэлтсийн дарга, нэгдүгээр орлогч сайд, сайд, МАХН-ын төв хорооны Гадаад харилцааны хэлтсийн дарга, БНМАУ-аас БНХАУ, БНСЧСУ, БНФУ, АБНЕУ, Алжир улс, БНЭУ-д суугаа элчин сайд, НҮБ-ын дэргэд суугаа Байнгын төлөөлөгч зэрэг өндөр хариуцлагатай албыг нэр төртэй хашиж байжээ. Монгол улсын Гадаад харилцааг хөгжүүлэх, олон улсын байр суурийг бэхжүүлэхэд оруулсан хувь нэмэр, гавьяа зүтгэлийг нь төр, засгаас өндрөөр үнэлж “Онц бөгөөд бүрэн эрхт элчин сайд” дипломат дээд цол хүртээжээ.