УИХ-ын гишүүн Г.Батхүү, Д.Батцогт нар болон зарим яамдын мэргэжилтнүүд байгууллагуудын удирдлагууд баруун аймгуудад ажилллалаа.

2015 оны 03 дугаар сарын 10-ны өдөр УИХ-ын гишүүн Г.Батхүү, Д.Батцогт, Зам тээврийн дэд сайд Х.Ержан нар болон аймгийн ИТХ-ын дарга Б.Баярсайхан, аймгийн Засаг дарга Д.Цэвээнравдан, ЗДТГ-ын дарга Б.Батмөнх нар Ховд аймгийн иргэдтэй уулзалт хийлээ.

Өнгөрсөн хоёр жилийн хугацаанд УИХ хийгээд Засгийн газрын үйл ажиллагаа ямар үр дүнд хүрсэн, мөн Эвслийн Засгийн газрыг яагаад байгуулах болсон талаар уулзалтын эхэнд танилцуулав. Зөвхөн Монголд төдийгүй олон улсад Эвслийн Засгийн газрыг байгуулж намууд зөвшилцөх нь улс эх орны ирээдүйд том түлхэц болдог. Ер нь Монголд улс талцал хагарлаас илүү эв нэгдэл чухал. Сүүлийн жил гаруй хугацаанд эдийн засгийн хямрал тулгамдсан асуудлыг нэг болоод буй. Дотоод болон гадаад шалтгаанууд Монголын эдийн засагт шууд хямрал биш хүндрэл авчирсан. Энэ хүндрэлийг даван туулахад улс төржиж, талцах биш эвсэж, нийлж хэлэлцэх нь хамгийн зөв алхам байсан гэдгийг тэрбээр онцолсон юм.

Түүнчлэн УИХ-ын ирэх хаврын чуулганаар хэд хэдэн томоохон хуулийг хэлэлцэн батлах төлөвлөгөөтэй байгааг энэ үеэр дуулгасан. Сонгуулийн тухай хууль, Улс төрийн намуудын тухай хууль, Үндсэн хуулийн өөрчлөлтөөр бий болох сайн засаглал гэх мэт. Эдгээр нь өнөөдөр улстөржилт өрх гэрийн төвшинд хүртэл талцуулж байгаа алдааг залруулах зорилготой гэсэн юм. Сонгуулийн хууль ард түмэн өөрийн төлөөллөө сонгоход илүү төгөлдөр болгоно. Харин Улс төрийн намуудын тухай хууль нь бизнес эрхлэгч, санхүүжүүлэгчийн хараат байдлаас намуудыг ангид байлгах зорилготой аж. Баруун таван аймаг өөрсдийн онцлогт түшиглэн хөгжих боломжууд бий. Ховд аймгийн онцлог боломжид тулгуурлан хөгжих гарцыг нь тодорхойлж, УИХ бодлого шийдвэр гаргаж байгааг Г.Батхүү гишүүн танилцууллаа.