Ховд аймгийн Жаргалант сумын Цаст-Алтай цогцолбор сургууль барилгадаа өргөтгөл хийж 640 хүүхдийн хичээлийн байр, спорт заалны барилга шинээр барьж, өнөөдөр /2020.10.23/ шинэ байрныхаа нээлтийг хийлээ.

Энэхүү бүтээн байгуулалтыг улсын төсвийн 5 тэрбум төгрөгийн хөрөнгө оруулалтаар “Баруун жонон” ХХК-ий хамт олон хийж гүйцэтгэсэн байна.

Тус сургуулийн өргөтгөл ашиглалтад орсноор сургалтын үйл ажиллагаа, хүчин чадлын хэмжээ өргөжих, сурагчид орчин үеийн стандарт шаардлагад нийцсэн тохилог орчинд сурч, хөгжих боломж бүрдэж байгаа юм. 30 анги танхим, спортын заал, номын сан, 200 хүүхэд хооллох чанар стандартын шаардлага хангасан жишиг гал тогоо бүхий шинэ хичээлийн байранд бага, дунд, ахлах ангийн сурагчид суралцана.