Ховд аймгийн Үенч сумын харъяат, Чөлөөт бөхийн спортын мастер Аймгийн Арслан Батчуулууны Батмөнхөд хүндэтгэл үзүүлэх “Мандал хайрхан уулын хишиг” үндэсний бөхийн барилдаан өнөөдөр аймгийн БТСГ-т боллоо.

Үндэсний бөхийн барилдааны нээлтэнд УИХ-ын гишүүн О.Батнасан, аймгийн ИТХ-ын дарга Г.Пүрэвганди, аймгийн Засаг даргын орлогч Т.Жаргалсайхан, аймгийн ИТХ-ын нарийн бичгийн дарга Б.Сандагсүрэн болон Үенч сумын удирдлагууд оролцлоо.

Энэ үеэр аймгийн ИТХ-ын дарга Г.Пүрэвганди, аймгийн ИТХ-ын нарийн бичгийн дарга Б.Сандагсүрэн нар аймгийн арслан Б.Батмөнхөд хүндэтгэл үзүүлж, ИТХ-ын Хүндэт өргөмжлөл, үнэ бүхий зүйлийг гардуулан өглөө. Мөн УИХ-ын гишүүн О.Батнасан, УИХ-ын гишүүн С.Бямбацогтын бие төлөөлөгч болон бусад албаны хүмүүс хүндэтгэл үзүүлэв.

Бөхийн барилдаанд аймаг, сумын цолтой 64 бөх барилдсанаас Увс аймгийн Ховд сумын харъяат аймгийн начин Л.Энхсаруул түрүүлж, Баян-Өлгий аймгийн Цэнгэл сумын харъяат аймгийн арслан М.Аманбек үзүүрлэн Баян-Өлгий аймгийн Булган сумын харъяат аймгийн нэмэх начин Б.Сундуй, Ховд аймгийн Зэрэг сумын харъяат аймгийн начин Ш.Баянжаргал нар шөвгөрлөө.