Ховд аймгийн ИТХ-ын дарга Г.Пүрэвгандиар ахлуулсан ажлын хэсэг сумын ИТХ-ын энэ оны үйл ажиллагааны явц, эрх зүйн бодлого чиглэл, зорилтын хэрэгжилтийн явцад дүн шинжилгээ хийж, цаашид анхаарах асуудлаар мэргэжил арга зүйн зөвлөгөө өгөх, өвөлжилтийн бэлтгэл ажилтай танилцах зорилгоор энэ сарын 12 ны өдөр Чандмань суманд ажиллалаа.

Энэхүү ажлын хэсгийн бүрэлдэхүүн Чандмань сумын ИТХ-ын үйл ажиллагаатай танилцсаны дараагаар тус сумын ИТХ-ын ажлын алба болоод Тэргүүлэгчдэд зөвлөгөө мэдээлэл хүргэв.

Үүний дараагаар аймгийн ИТХ-ын дарга Г.Пүрэвганди, Тогтвортой амьжиргаа-3 төслийн менежер Ж.Батсайхан нар сум орон нутаг, малчдын өвөлжилтийн бэлтгэл байдалтай газар дээр нь танилцаж, тулгамдсан асуудлын талаар санал солилцон, цаашид анхаарах, авч хэрэгжүүлэх асуудлуудын талаар ярилцлаа. 

Чандмань сумын хувьд нийтдээ 601,6 мянган га нутаг дэвсгэртэй, үүний 460 гаруй мянган га нь бэлчээрийн нутаг дэвсгэрт багтдаг байна. 2017 оны эхний хагас жилийн мал тооллогоор 410 мянган толгой мал тоолуулжээ. Нэг хүнд ногдох малын тоо, болон нэг га-д ногдох малын тоо нь бэлчээрийн даацад онцгой нөлөөлж, шинэчлэн тогтоосноор тус сумын бэлчээрийн даац 9,8 дахин хэтэрсэн үзүүлэлттэй байгаа нь өвөлжилт хүндрэх нэг гол шалтгаан болж байна.

Чандмань сумын хувьд нийт нутаг дэвсгэрийн зөвхөн 30 хувьд нь мал өвөлжих боломжтой харин үлдсэн 70 хувьд нь өвөлжилт болон хаваржилт хийх ямарч боломжгүй байгаа гэнэ. Тиймээс тус сумын нийт малчдын бараг 50 хувь нь 3 аймгийн 11 сумын нутагт  отроор өвөлжихөөр болжээ.