БНХАУ-ын ШУӨЗО-ы Цонж Хуй үндэстний өөртөө засах аймгийн Засаг даргын орлогч Ма Хун Жүн тэргүүтэй төлөөлөгчид Ховд аймагт 5 дугаар сарын 8-аас ажиллаж байна. Тэднийг өнөөдөр аймгийн ИТХ-ын дарга Г.Пүрэвганди, аймгийн Засаг дарга Д.Галсандондог тэргүүтэй Ховд аймгийн удирдлагууд ЗДТГ-ын Ёслол хүндэтгэлийн өргөөнөө хүлээн авч уулзан, хамтран ажиллах чиглэлээр санал солилцож, тодорхой үр дүнд хүрсэн юм.

Энэхүү уулзалтын үеэр талууд хэлэлцэн тохиролцож, жилд 4 хэн удаа ажилладаг байсан Улиастай-Байтаг боомтыг байнгын үйл ажиллагаатай болгох асуудлыг 2 улсын Засгийн газар, холбогдох яамдад уламжилж, 2017 оны 2 дугаар хагаст шийдвэрлүүлэхээр болов. Мөн Улиастай-Байтаг боомтоос Булган сум хүртэлх 120 км авто замыг Хятадын тал 100 хувийн хөрөнгө оруулалтаар барих асуудлыг хэлэлцэн БНХАУ-ын ШУӨЗО-ны Цонж Хуй үндэстний өөртөө засах аймгийн Чита сум, Лю Ди Ван ХХК-ны хөрөнгө оруулалтаар барихаар шийдвэрлэсэн байна. Ховд аймагт хийгдэх томоохон бүтээн байгуулалт, хөрөнгө оруулалтын энэхүү ажлыг МУ-ын Засгийн газрын хувьд дэмжиж байгаа юм. 

Түүнчлэн уулзалтын үеэр хоёр аймгийн найрамдалт харилцааг бэхжүүлэн, уул уурхай, худалдаа, эдийн засаг, түүх соёлын чиглэлээр хамтран ажиллахаар болж, санамж бичигт гарын үсэг үзэглэлээ.